Arooz is now on the App Store, for iPhone and iPad. Download →

All poetry

بہار آئی ہے عالم میں عجب وحشت کا ساماں ہے

Aali Gopalpuri (1912–1980)

بہار آئی ہے عالم میں عجب وحشت کا ساماں ہے

بیاباں میں کبھی گھر ہے کبھی گھر میں بیاباں ہے

مری پابندیاں ہی جب مری آزادیاں ٹھہریں

تو گلشن ہو کہ صحرا سب مری نظروں میں زنداں ہے

ہر اک سرمست عرفاں ہے مگر ہے فرق بس اتنا

کہیں دریا میں قطرہ ہے کہیں قطرے میں طوفاں ہے

چمن میں پھول ہیں پھولوں پہ کچھ بکھرے ہوئے تنکے

مرا اجڑا نشیمن بھی گلستاں در گلستاں ہے

سمجھ میں کچھ نہیں آتا دعا کس چیز کی مانگوں

کبھی جینے کی خواہش ہے کبھی مرنے کا ارماں ہے

کہاں کا قصہ ہے آخر یہ دل میں کیا سمائی ہے

پلٹ جاؤ پلٹ جاؤ ادھر گور غریباں ہے

نہ چھوڑا فرق کچھ وحشت نے میرے جیب و داماں میں

گریباں ہے جو دامن ہے جو دامن ہے گریباں ہے

رکی ہے لب پہ جاں آکر پہ اب تو موت بھی عالیؔ

عجب کچھ کشمکش میں ہے نہ مشکل ہے نہ آساں ہے