مل گئی درد کی دوا دل کو

مل گئی درد کی دوا دل کو

رکھے اللہ میرے قاتل کو

عشق نے داغ وہ دیا دل کو

آ گئی شرم ماہ کامل کو

کٹ چکی تھی رگ حیات مری

رحم کب آیا میرے قاتل کو

مانا رہزن ہے راہبر میرا

کیا کہوں میں چراغ منزل کو

کس کی کشتی لگی کنارے سے

زلزلہ آ رہا ہے ساحل کو

صبح کو پر تراشے جائیں گے

کوئی کر دے خبر عنادل کو

داغ دل میرا دیکھنے والے

شمع کہتے ہیں ماہ کامل کو

مانا ظالم ہیں بے وفا ہیں پھول

شکوہ زیبا نہیں عنادل کو

یوں ہی دیکھا نہیں مآل عشق

زحمتیں دی ہیں دست قاتل کو

میں چلا گرد کارواں کے ساتھ

کہہ دو میرا سلام منزل کو

مانا عاجز ہیں جاں سے پروانے

چاہئے کیا چراغ محفل کو

موت نے شام سے سلایا مجھے

نیند شب بھر نہ آئی قاتل کو

ڈوب کر پا لیا سکون حیات

پہونچے ساحل پہ کھو کے ساحل کو

ان پہ اک روز پڑ گئی تھی نظر

عمر بھر جھیلنا پڑا دل کو

غم میں پھولوں کے بارہا عالیؔ

دیکھا روتے ہوئے عنادل کو

mil gai dard ki dawa dil ko

rakhe allah mere qatil ko

ishq ne dagh wo diya dil ko

a gai sharm mah-e-kamil ko

kat chuki thi rag-e-hayat miri

rahm kab aya mere qatil ko

mana rahzan hai rahbar mera

kya kahon main charagh-e-manzil ko

kis ki kashti lagi kinare se

zalzala a raha hai sahil ko

subh ko par tarashe jaenge

koi kar de khabar anadil ko

dagh-e-dil mera dekhne wale

shama kahte hain mah-e-kamil ko

mana zalim hain be wafa hain phul

shikwa zeba nahin anadil ko

yun hi dekha nahin maal-e-ishq

zahmaten di hain dast-e-qatil ko

main chala gard-e-karwan ke sath

kah do mera salam manzil ko

mana ajiz hain jan se parwane

chahiye kya charagh-e-mahfil ko

maut ne sham se sulaya mujhe

nind shab bhar na ai qatil ko

dub kar pa liya sukun-e-hayat

pahunche sahil pe kho ke sahil ko

un pe ik roz par gai thi nazar

umr bhar jhelna para dil ko

gham mein phulon ke barha ali

dekha rote hue anadil ko