بے زر کی بے زری کا مزا ہم سے پوچھئے

بے زر کی بے زری کا مزا ہم سے پوچھئے

کیسا ہے مفلسی کا مزا ہم سے پوچھئے

کانٹے تو پھر بھی کانٹے ہیں ان سے گلہ ہے کیا

پھولوں سے دوستی کا مزا ہم سے پوچھئے

پہچان کر بھی وہ ہمیں پہچانتے نہیں

دانستہ بے رخی کا مزا ہم سے پوچھئے

جو گھر جلا ہے چشم عنایت سے آپ کی

اس گھر کی روشنی کا مزا ہم سے پوچھئے

پھرتے تھے میرؔ خوار کوئی پوچھتا نہ تھا

اب عشق و عاشقی کا مزا ہم سے پوچھئے

دانش کدوں میں جہل مرکب کا شور و شر

اس دور آگہی کا مزا ہم سے پوچھئے

وہ کیا بتائیں گے جنہیں دریا نصیب ہے

بہزادؔ تشنگی کا مزا ہم سے پوچھئے

be zar ki be zari ka maza ham se puchhiye

kaisa hai muflisi ka maza ham se puchhiye

kante to phir bhi kante hain un se gila hai kya

phulon se dosti ka maza ham se puchhiye

pahchan kar bhi wo hamen pahchante nahin

danista be rukhi ka maza ham se puchhiye

jo ghar jala hai chashm-e-inayat se ap ki

is ghar ki raushni ka maza ham se puchhiye

phirte the mir khwar koi puchhta na tha

ab ishq-o-ashiqi ka maza ham se puchhiye

danish kadon mein jahl-e-murakkab ka shor-o-shar

is daur agahi ka maza ham se puchhiye

wo kya bataenge jinhen dariya nasib hai

behzad tishnagi ka maza ham se puchhiye