اب تو زیبا نہیں اے رند گلہ بھی تیرا

اب تو زیبا نہیں اے رند گلہ بھی تیرا

جام ساقی نے سر بزم بھرا بھی تیرا

دل میں جب گرمیٔ اخلاص و محبت ہی نہیں

کام آنے کا نہیں حرف دعا بھی تیرا

بے خطر ڈال دے موجوں میں سفینہ اپنا

ناخدا بھی ہے ترا اور خدا بھی تیرا

آج طوفان اٹھانے کو اٹھا لے لیکن

زور گھٹ جائے گا اے موج بلا بھی تیرا

لب ہلانے کی یہاں جبکہ اجازت ہی نہیں

کس زباں سے کریں اے دوست گلہ بھی تیرا

ہم تو ہیں آج بھی محروم‌ نظارا بہزادؔ

ایک وہ ہیں جنہیں دیدار ہوا بھی تیرا

ab to zeba nahin ai rind gila bhi tera

jam-e-saqi ne sar-e-bazm bhara bhi tera

dil mein jab garmi-e-ikhlas-o-mohabbat hi nahin

kam ane ka nahin harf-e-dua bhi tera

be khatar dal de maujon mein safina apna

nakhuda bhi hai tira aur khuda bhi tera

aj tufan uthane ko utha le lekin

zor ghut jaega ai mauj-e-bala bhi tera

lab hilane ki yahan jabke ijazat hi nahin

kis zaban se karen ai dost gila bhi tera

ham to hain aj bhi mahrum nazara behzad

ek wo hain jinhen didar hua bhi tera