شعور فکر ہونا یا کہ ادراک سخن ہونا

شعور فکر ہونا یا کہ ادراک سخن ہونا

عطائے خاص قدرت ہے کسی کا اہل فن ہونا

مقدر بن گئیں تاریکیاں شام غریباں کی

قیامت تھا مرا رد کردۂ صبح وطن ہونا

غبار کم نگاہی میں نظر کیا خاک آئے گا

مرے خون گلو کا غازۂ حسن چمن ہونا

جہاں بارش ہو آنسو کی شب غم کے اندھیرے میں

غنیمت ہے کسی لب پہ تبسم کی کرن ہونا

ابھی کھلنے ہی پایا تھا کہ توڑا دست گلچیں نے

نہ راس آیا چمن میں پھول کو رنگ چمن ہونا

وہی مانوس گلیاں اجنبی معلوم ہوتی ہیں

مصیبت ہے کسی کا بھی وطن میں بے وطن ہونا

بساط سوز غم پہ قسمتیں دونوں کی یکساں ہیں

پر پروانہ ہونا یا چراغ انجمن ہونا

سنوارا کرتے ہیں بہزادؔ بھی زلف سخن لیکن

میسر کب ہوا منجملۂ ارباب فن ہونا

shuur-e-fikr hona ya ke idrak-e-sukhan hona

ata-e-khas qudrat hai kisi ka ahl-e-fan hona

muqaddar ban gain tarikiyan sham-e-ghariban ki

qayamat tha mira rad karda-e-subh-e-watan hona

ghubar kam nigahi mein nazar kya khak aega

mire khun-e-galo ka ghaza-e-husn-e-chaman hona

jahan barish ho ansu ki shab-e-gham ke andhere mein

ghanimat hai kisi lab pe tabassum ki kiran hona

abhi khulne hi paya tha ke tora dast-e-gulchin ne

na ras aya chaman mein phul ko rang-e-chaman hona

wahi manus galiyan ajnabi maalum hoti hain

musibat hai kisi ka bhi watan mein be watan hona

bisat-e-soz-e-gham pe qismaten donon ki yaksan hain

par parwana hona ya charagh-e-anjuman hona

sanwara karte hain behzad bhi zulf-e-sukhan lekin

muyassar kab hua minjumla-e-arbab-e-fan hona