ہم نشیں کچھ تو علاج دل شیدا کر دے
Bahzad Fatami (b. 1914)ہم نشیں کچھ تو علاج دل شیدا کر دے
زندگی کو نہ مری نذر تماشا کر دے
جام الفت سے مرے لب کو شناسا کر دے
وقف اوروں کے لئے وسعت دریا کر دے
آستانوں کو تو بے شک نہ کمی ہے لیکن
سجدہ ریزی کا جنوں تجھ کو نہ رسوا کر دے
دیکھ لیں اپنی بھی آنکھوں سے وہ انجام ستم
کور چشموں کو عطا دیدۂ بینا کر دے
رکھئے احسان نہ اس چارہ گری کا ہم پر
دل کے زخموں کو جو کچھ اور بھی گہرا کر دے
بھیک میں مانگے اجالوں پہ گزارا کب تک
اس سے بہتر تو یہی ہے کہ اندھیرا کر دے
زہر کا جام سہی بادۂ رنگیں نہ سہی
تو اگر چاہے تو اس کو بھی گوارا کر دے
زرد چہروں پہ بھی کھل جائے گلستان شباب
تیری دزدیدہ نگاہی جو اشارہ کر دے
بار ہے تجھ پہ جو زنجیر تعلق اے دوست
بیڑیاں کاٹ کے اس قید کو ہلکا کر دے
گرمیٔ فن سے ہنر مندیٔ دست فنکار
سخت پتھر کو اگر چاہے تو شیشہ کر دے
مٹ ہی جائے گی شب غم کی سیاہی بہزادؔ
دل کو روشن جو چراغ رخ زیبا کر دے
ham nashin kuchh to ilaj-e-dil-e-shaida kar de
zindagi ko na miri nazr-e-tamasha kar de
jam-e-ulfat se mire lab ko shanasa kar de
waqf-e-auron ke liye wusat-e-dariya kar de
astanon ko to be shak na kami hai lekin
sajda rezi ka junun tujh ko na ruswa kar de
dekh len apni bhi ankhon se wo anjam-e-sitam
kor chashmon ko ata dida-e-bina kar de
rakhiye ehsan na is chara giri ka ham par
dil ke zakhmon ko jo kuchh aur bhi gahra kar de
bhik mein mange ujalon pe guzara kab tak
is se behtar to yahi hai ke andhera kar de
zahr ka jam sahi bada-e-rangin na sahi
tu agar chahe to us ko bhi gawara kar de
zard chehron pe bhi khul jae gulistan-e-shabab
teri duzdida nigahi jo ishara kar de
bar hai tujh pe jo zanjir-e-taalluq ai dost
beriyan kat ke is qaid ko halka kar de
garmi-e-fan se hunar mandi-e-dast-e-fankar
sakht patthar ko agar chahe to shisha kar de
mit hi jaegi shab-e-gham ki siyahi behzad
dil ko raushan jo charagh-e-rukh-e-zeba kar de