یہ بیداد بہار فتنہ ساماں کون دیکھے گا

یہ بیداد بہار فتنہ ساماں کون دیکھے گا

بھری برسات میں جلتا گلستاں کون دیکھے گا

بچا لینا تو ممکن ہے بھنور سے اپنی کشتی کو

جو پوشیدہ ہو ساحل میں وہ طوفاں کون دیکھے گا

سر محفل تو پروانوں کو جلتا سب نے دیکھا ہے

ترا سوز دروں اے شمع گریاں کون دیکھے گا

لہو سے لکھ تو دی تاریخ آزادی اسیروں نے

کسے فرصت در و دیوار زنداں کون دیکھے گا

گل افشانی تو کرتی ہے ہماری چشم تر لیکن

اس اندھے شہر میں تزئین داماں کون دیکھے گا

نہ ہو آباد رندوں سے جو تیری انجمن ساقی

تیرے دست کرم کے جود و احساں کون دیکھے گا

یہاں تو فکر ہے بہزادؔ اپنے ہی گریباں کی

فقیر شہر کا چاک گریباں کون دیکھے گا

ye bedad-e-bahar-e-fitna saman kaun dekhega

bhari barsat mein jalta gulistan kaun dekhega

bacha lena to mumkin hai bhanwar se apni kashti ko

jo poshida ho sahil mein wo tufan kaun dekhega

sar-e-mahfil to parwanon ko jalta sab ne dekha hai

tira soz-e-darun ai sham-e-giryan kaun dekhega

lahu se likh to di tarikh azadi asiron ne

kise fursat dar-o-diwar-e-zindan kaun dekhega

gul afshani to karti hai hamari chashm-e-tar lekin

is andhe shahr mein tazin-e-daman kaun dekhega

na ho abad rindon se jo teri anjuman saqi

tere dast-e-karam ke jud-o-ehsan kaun dekhega

yahan to fikr hai behzad apne hi gareban ki

faqir-e-shahr ka chak-e-gareban kaun dekhega