اثر میں آتا گیا میں تری سخاوت کے

اثر میں آتا گیا میں تری سخاوت کے

دراز ہوتے گئے ہاتھ میری حاجت کے

لبوں پہ موجۂ نکہت یوںہی نہیں رقصاں

کھلے ہیں پھول مرے دل میں تیری چاہت کے

تپش کچھ ایسی تھی خورشید استقامت کی

پسینے چھوٹ گئے شعلۂ عداوت کے

یہ بات بات میں ترک تعلقات کی بات

بتاؤ کیا یہی آداب ہیں محبت کے

ہمیں بھی بخش سکوں آ کبھی ادھر بھی آ

کہ ہم بھی ہیں متمنی تری زیارت کے

نوازشیں تری حائل اگر نہیں ہوتیں

تو ہم بھی کرتے نظارے سکون و راحت کے

دمک رہے ہیں جو دامن پہ بن کے لعل و گہر

حبیبؔ اشک ہیں دراصل وہ ندامت کے

asar mein ata gaya main tiri sakhawat ke

daraz hote gae hath meri hajat ke

labon pe mauja-e-nikhat yunhi nahin raqsan

khule hain phul mire dil mein teri chahat ke

tapish kuchh aisi thi khurshid istiqamat ki

pasine chhut gae shola-e-adawat ke

ye bat bat mein tark-e-taalluqat ki bat

batao kya yahi adab hain mohabbat ke

hamen bhi bakhsh sakun a kabhi idhar bhi a

ke ham bhi hain mutamanni tiri ziyarat ke

nawazishen tiri hail agar nahin hotin

to ham bhi karte nazare sukun-o-rahat ke

damak rahe hain jo daman pe ban ke laal-o-guhar

habib ashk hain darasl wo nadamat ke