مرا خیال پریشاں ہے میرا گھر تنہا

مرا خیال پریشاں ہے میرا گھر تنہا

نہ جائیے مجھے ایسے میں چھوڑ کر تنہا

سحر سے شام کے یہ فاصلے نہیں کٹتے

ادھر ہے شام اکیلی ادھر سحر تنہا

قریب رہ کے بھی صدیوں کا فاصلہ ہے ابھی

میں کس قدر ہوں ترے ساتھ کس قدر تنہا

ہمارے ساتھ ہے دنیا ہمارے ساتھ چلیں

جناب خضر نہ بھٹکیں ادھر ادھر تنہا

وہ ایک لمحہ نہیں جو ترے تصور میں

لرز رہا ہے چراغ خیال پر تنہا

ہوا خموش سفینہ نڈھال دل زخمی

کھڑا ہے پانی میں شاداںؔ کمر کمر تنہا

mira khayal pareshan hai mera ghar tanha

na jaiye mujhe aise mein chhor kar tanha

sahar se sham ke ye fasle nahin katte

idhar hai sham akeli idhar sahar tanha

qarib rah ke bhi sadiyon ka fasla hai abhi

main kis qadar hun tire sath kis qadar tanha

hamare sath hai duniya hamare sath chalen

janab-e-khizr na bhatken idhar idhar tanha

wo ek lamha nahin jo tire tasawwur mein

laraz raha hai charagh-e-khayal par tanha

hawa khamosh safina nidhal dil zakhmi

khara hai pani mein shadan kamar kamar tanha