وہ سوز و ساز وہ نغمہ خیال و خواب ہوا

وہ سوز و ساز وہ نغمہ خیال و خواب ہوا

مٹا کے ہم کو زمانہ بہت خراب ہوا

وہ شخص موم کا چہرہ لگائے پھرتا تھا

وہ آج دھوپ میں نکلا تو بے نقاب ہوا

حریم ناز سے آئی ہے قہقہوں کی صدا

مرے سوال کا شاید یہی جواب ہوا

ہزار بار ترا شکریہ غم دوراں

ہزار بار ہمارا ہی انتخاب ہوا

خدا گواہ کوئی مجھ سا خوش نصیب نہیں

صلیب و دار پہ جب بھی ہوا حساب ہوا

چھوا جو پھول تو شاداںؔ الجھ گئے کانٹے

گلوں سے ہاتھ لگانا بھی اک عذاب ہوا

wo soz-o-saz wo naghma khayal-o-khwab hua

mita ke ham ko zamana bahut kharab hua

wo shakhs mom ka chehra lagae phirta tha

wo aj dhup mein nikla to be naqab hua

harim-e-naz se ai hai qahqahon ki sada

mire sawal ka shayad yahi jawab hua

hazar bar tira shukriya gham-e-dauran

hazar bar hamara hi intikhab hua

khuda gawah koi mujh sa khush nasib nahin

salib-o-dar pe jab bhi hua hisab hua

chhua jo phul to shadan ulajh gae kante

gulon se hath lagana bhi ik azab hua