راز غم افشا کروں یا راز رکھوں راز میں

راز غم افشا کروں یا راز رکھوں راز میں

حکم ہو تو کچھ سناؤں آپ کی آواز میں

تم نے ہنس کر فرق ڈالا ہے یہ سوز و ساز میں

ورنہ دونوں نغمہ زن تھے ایک ہی آواز میں

جب یہ سمجھا غم کا ہر انجام اک آغاز ہے

میں نے خود انجام شامل کر لیا آغاز میں

میں تو اچھا ہوں مگر اے چارہ گر یہ تو بتا

فرق کیوں محسوس کرتا ہوں تری آواز میں

ہو چکی ترکیب ناقوس و اذاں نا کامیاب

سوچتا ہوں اب پکاروں کونسی آواز میں

آپ سے جب آپ کے شاداںؔ کو نسبت ہی نہیں

ربط کیسا ہے یہ اس کی آپ کی آواز میں