میرا غم میرے خیالات ہی سب کچھ تو نہیں

میرا غم میرے خیالات ہی سب کچھ تو نہیں

ان کی محفل میں مری بات ہی سب کچھ تو نہیں

عمر اک شب کی نہیں پھر بھی مجھے ہجر کی رات

یہ گماں ہوتا ہے یہ رات ہی سب کچھ تو نہیں

ہوں نہ بندے تو خدائی کی حقیقت کیا ہے

ہم بھی اک شے ہیں تری ذات ہی سب کچھ تو نہیں

میری مشکل مری دوری کا بھی احساس حضور

آپ کی بزم کے اوقات ہی سب کچھ تو نہیں

بطن فردا میں بھی تعمیر کے امکاں ہیں بہت

آج کی صورت حالات ہی سب کچھ تو نہیں

لیجے اب اپنے گریباں کی خبر بھی شاداںؔ

ان کے دامن کی مدارات ہی سب کچھ تو نہیں

mera gham mere khayalat hi sab kuchh to nahin

un ki mahfil mein miri bat hi sab kuchh to nahin

umr ik shab ki nahin phir bhi mujhe hijr ki rat

ye guman hota hai ye rat hi sab kuchh to nahin

hun na bande to khudai ki haqiqat kya hai

ham bhi ik shai hain tiri zat hi sab kuchh to nahin

meri mushkil miri duri ka bhi ehsas-e-huzur

ap ki bazm ke auqat hi sab kuchh to nahin

batn-e-farda mein bhi taamir ke imkan hain bahut

aj ki surat-e-halat hi sab kuchh to nahin

lije ab apne gareban ki khabar bhi shadan

un ke daman ki madarat hi sab kuchh to nahin