یادوں کو دھواں کر کے اڑا کیوں نہیں دیتے

یادوں کو دھواں کر کے اڑا کیوں نہیں دیتے

طاقت ہے تو تم مجھ کو بھلا کیوں نہیں دیتے

تم مجھ کو خطاؤں کی سزا کیوں نہیں دیتے

اس عہد میں جینے کی دعا کیوں نہیں دیتے

گھنگھور اندھیرا ہے اگر مد مقابل

پردہ رخ روشن سے اٹھا کیوں نہیں دیتے

ناقص جنہیں لگتا ہے ہر اک شعر تمہارا

تم ان کی غزل ان کو سنا کیوں نہیں دیتے

کہتی ہے سخی ابن سخی آپ کو دنیا

پھر آپ مجھے حق بھی مرا کیوں نہیں دیتے

دریا کی خموشی اگر اچھی نہیں لگتی

پانی میں کوئی چیز گرا کیوں نہیں دیتے

سجدہ تو سبھی کرتے ہیں رسموں کے بتوں کو

سر تم بھی حبیبؔ اپنا جھکا کیوں نہیں دیتے

yadon ko dhuan kar ke ura kyun nahin dete

taqat hai to tum mujh ko bhala kyun nahin dete

tum mujh ko khataon ki saza kyun nahin dete

is ahd mein jine ki dua kyun nahin dete

ghanghor andhera hai agar mad-e-muqabil

parda rukh-e-raushan se utha kyun nahin dete

naqis jinhen lagta hai har ik sher tumhara

tum un ki ghazal un ko suna kyun nahin dete

kahti hai sakhi ibn-e-sakhi ap ko duniya

phir ap mujhe haq bhi mira kyun nahin dete

dariya ki khamoshi agar achchhi nahin lagti

pani mein koi chiz gira kyun nahin dete

sajda to sabhi karte hain rasmon ke buton ko

sar tum bhi habib apna jhuka kyun nahin dete