برنگ نکہت گل ہے چمن میں آشیاں اپنا

برنگ نکہت گل ہے چمن میں آشیاں اپنا

کسی کے راز داں ہم ہیں نہ کوئی رازداں اپنا

چلے تو جا رہے ہیں کیا بتائیں کل کہاں ہوں گے

خدا معلوم کس منزل پہ ٹھہرے کارواں اپنا

یہی اچھا ہوا محفل میں تیری چپ رہے ورنہ

غم دل کی کہانی اور پھر طرز بیاں اپنا

سپرد عشق ہم تو کر چکے سرمایۂ ہستی

جو اہل ہوش ہیں سوچا کریں سود و زیاں اپنا

ہوا ہی چاہتی ہے شام بھی اب صبح پیری کی

مگر اب تک تو ہے پہلو میں قیصرؔ دل جواں اپنا

barang-e-nikhat-e-gul hai chaman mein ashiyan apna

kisi ke raz dan ham hain na koi razdan apna

chale to ja rahe hain kya bataen kal kahan honge

khuda maalum kis manzil pe thahre karwan apna

yahi achchha hua mahfil mein teri chup rahe warna

gham-e-dil ki kahani aur phir tarz-e-bayan apna

supurd-e-ishq ham to kar chuke sarmaya-e-hasti

jo ahl-e-hosh hain socha karen sud-o-ziyan apna

hawa hi chahti hai sham bhi ab subh piri ki

magar ab tak to hai pahlu mein qaisar dil jawan apna