آرزوئیں جل گئیں شوق فراواں جل گیا

آرزوئیں جل گئیں شوق فراواں جل گیا

بجھ گیا دل زندگی کا ساز و ساماں جل گیا

موسم گل تھا کہ تھی برق خزاں زیر نقاب

پھول ہنسنے بھی نہ پائے تھے گلستاں جل گیا

شوق منزل میں جنوں کی گرم رفتاری نہ پوچھ

راہ کے کانٹوں کی کیا ہستی بیاباں جل گیا

جھوم کر سوئے چمن آیا تو کیا برسا تو کیا

آشیاں تو کب کا اے ابر بہاراں جل گیا

حشر کے دن رحمت حق نے لیا آغوش میں

ذوق عصیاں پر مرے زاہد کا ایماں جل گیا

دیکھ قیصرؔ یہ ہے گلشن میں مآل فصل گل

غنچے غنچے کا گلستاں میں گریباں جل گیا

arzuen jal gain shauq-e-farawan jal gaya

bujh gaya dil zindagi ka saz-o-saman jal gaya

mausam-e-gul tha ke thi barq-e-khizan zer-e-naqab

phul hansne bhi na pae the gulistan jal gaya

shauq-e-manzil mein junun ki garm raftari na puchh

rah ke kanton ki kya hasti bayaban jal gaya

jhum kar su-e-chaman aya to kya barsa to kya

ashiyan to kab ka ai abr-e-baharan jal gaya

hashr ke din rahmat-e-haq ne liya aghosh mein

zauq-e-isyan par mire zahid ka iman jal gaya

dekh qaisar ye hai gulshan mein maal-e-fasl-e-gul

ghunche ghunche ka gulistan mein gareban jal gaya