سرخ مٹی کو ہواؤں میں اڑاتے ہوئے ہم

سرخ مٹی کو ہواؤں میں اڑاتے ہوئے ہم

اپنی آمد کے لئے دشت سجاتے ہوئے ہم

تجھ تبسم کی محبت میں ہوئے ہیں برباد

مسکرائیں گے ترا سوگ مناتے ہوئے ہم

لا مکانی میں ہمیں چھوڑ کے جاتا ہوا تو

دشت امکاں سے تجھے ڈھونڈ کے لاتے ہوئے ہم

اے خدا تو ہی بتا کیسے کریں گے انکار

عالم ہو میں تجھے ہاتھ لگاتے ہوئے ہم

رقص کرتے ہیں تو مٹی تو اڑے گی پیارے

ان کو لگتے ہیں کرامات دکھاتے ہوئے ہم

اپنے ہونے سے بھی انکار کئے جاتے ہیں

تیرے ہونے کا یقیں خود کو دلاتے ہوئے ہم

اب اے وحشت میں گندھی خاک رکھی چاک پہ اور

اپنے ہونے کے لئے چاک گھماتے ہوئے ہم

حالت وجد کے حالات بتا بات ہو تو

حالت حال میں تفریح اٹھاتے ہوئے ہم

خامشی شور ہیں اور شور بلا کا سرمدؔ

تم نے دیکھے ہیں کہیں شور مچاتے ہوئے ہم

surkh mitti ko hawaon mein urate hue ham

apni amad ke liye dasht sajate hue ham

tujh tabassum ki mohabbat mein hue hain barbad

muskuraenge tira sog manate hue ham

la makani mein hamen chhor ke jata hua to

dasht-e-imkan se tujhe dhund ke late hue ham

ai khuda tu hi bata kaise karenge inkar

alam ho main tujhe hath lagate hue ham

raqs karte hain to mitti to uregi pyare

un ko lagte hain karamat dikhate hue ham

apne hone se bhi inkar kiye jate hain

tere hone ka yaqin khud ko dilate hue ham

ab ai wahshat mein gandhi khak rakhi chak pe aur

apne hone ke liye chak ghumate hue ham

halat-e-wajd ke halat bata bat ho to

halat-e-hal mein tafrih uthate hue ham

khamushi shor hain aur shor bala ka sarmad

tum ne dekhe hain kahin shor machate hue ham