بارہا یورش افکار نے سونے نہ دیا

بارہا یورش افکار نے سونے نہ دیا

فکر آزاد ہے آزار نے سونے نہ دیا

بند تھیں دائرۂ خواب میں آنکھیں اپنی

فکر کی گردش پرکار نے سونے نہ دیا

تھی تصور میں نہاں خانۂ دل کی تصویر

رات بھر دیدۂ بے دار نے سونے نہ دیا

مجھ سے تھے بر سر پیکار مرے ذہن و ضمیر

مجھ کو بیدارئ کردار نے سونے نہ دیا

کوئی منظر تھا کہ تھا منظر رنگیں کا فریب

کیا کہیں خواب پر اسرار نے سونے نہ دیا

مجھ پہ اس طرح سے روشن تھی حقیقت اپنی

عمر بھر چشم خبردار نے سونے نہ دیا

میں نے کچھ دھوپ میں جلتے ہوئے چہرے دیکھے

پھر مجھے سایۂ دیوار نے سونے نہ دیا

رات بھر بارش الہام رہی ہے دل پر

صبح تک ابر گہر بار نے سونے نہ دیا

لیثؔ موضوع سخن فکر بشر تھی ہم تھے

اور پھر گرمئ گفتار نے سونے نہ دیا

barha yurish-e-afkar ne sone na diya

fikr-e-azad hai azar ne sone na diya

band thin daira-e-khwab mein ankhen apni

fikr ki gardish-e-parkar ne sone na diya

thi tasawwur mein nihan khana-e-dil ki taswir

rat bhar dida-e-be dar ne sone na diya

mujh se the bar sar-e-paikar mire zehn-o-zamir

mujh ko bedari-e-kirdar ne sone na diya

koi manzar tha ke tha manzar-e-rangin ka fareb

kya kahen khwab pur asrar ne sone na diya

mujh pe is tarah se raushan thi haqiqat apni

umr bhar chashm-e-khabardar ne sone na diya

main ne kuchh dhup mein jalte hue chehre dekhe

phir mujhe saya-e-diwar ne sone na diya

rat bhar barish-e-ilham rahi hai dil par

subh tak abr-e-guhar bar ne sone na diya

les mauzu-e-sukhan fikr-e-bashar thi ham the

aur phir garmi-e-guftar ne sone na diya