جو اتفاق سے ہم صاحب فراش ہوئے

جو اتفاق سے ہم صاحب فراش ہوئے

تو ہم پہ راز عزیزاں بھی خوب فاش ہوئے

ہم آئنہ تو نہیں پھر بھی رات بستر پر

گرے جو آ کے تو گرتے ہی پاش پاش ہوئے

کسے سنائیے آزادگان شہر کا حال

کہ رفتہ رفتہ سبھی کشتۂ معاش ہوئے

نہ پوچھ اشک ریا کار کا مآل اے دوست

وہ اشک تو رخ احساس کی خراش ہوئے

تمام عمر تلاش سکوں رہی ہم کو

تمام عمر نہ آسودۂ تلاش ہوئے

کہاں کی نغمہ سرائی کہ ساز ہستی کے

تمام تار ہی محروم ارتعاش ہوئے

جناب لیثؔ جو احباب سے گریزاں تھے

یہ انقلاب تو دیکھو کہ یار باش ہوئے

jo ittifaq se ham sahab-e-firash hue

to ham pe raz azizan bhi khub fash hue

ham aina to nahin phir bhi rat bistar par

gire jo a ke to girte hi pash pash hue

kise sunaiye azadgan shahr ka hal

ke rafta rafta sabhi kushta-e-maash hue

na puchh ashk riya kar ka maal ai dost

wo ashk to rukh ehsas ki kharash hue

tamam umr talash-e-sakun rahi ham ko

tamam umr na asuda-e-talash hue

kahan ki naghma sarai ke saz-e-hasti ke

tamam tar hi mahrum irtiash hue

janab les jo ahbab se gurezan the

ye inqilab to dekho ke yar bash hue