سکوت لب کو مرے عرض حال ہی سمجھو

سکوت لب کو مرے عرض حال ہی سمجھو

مری انائے خفی کو سوال ہی سمجھو

وہ روبرو ہیں مرے دل مگر یہ کہتا ہے

خیال حسن کو حسن خیال ہی سمجھو

رفاقتوں کے قرینے بدلتے رہتے ہیں

سو کرب‌ ہجر کو لطف وصال ہی سمجھو

تڑپ رہے ہیں جو یوں ہم صدائے ساز کے ساتھ

اسے کچھ اور نہیں وجد و حال ہی سمجھو

مرے ہنر کو رہا بزم کم نظر سے گریز

اسے بھی میرے ہنر کا کمال ہی سمجھو

ہوائے صبح چمن اور ایک بار اگر

گزر گئی تو ہمیں پائمال ہی سمجھو

دلوں کے زخم چھپے ہیں لہو کی چادر میں

تمہیں غرض نہیں تم اندمال ہی سمجھو

حصول کیف کو میخانۂ حیات میں لیثؔ

شکست جام سے پہلے محال ہی سمجھو

sukut-e-lab ko mire arz-e-hal hi samjho

miri ana-e-khafi ko sawal hi samjho

wo rubaru hain mire dil magar ye kahta hai

khayal-e-husn ko husn-e-khayal hi samjho

rifaqaton ke qarine badalte rahte hain

so karb-e-hijr ko lutf-e-wisal hi samjho

tarap rahe hain jo yun ham sada-e-saz ke sath

use kuchh aur nahin wajd-o-hal hi samjho

mire hunar ko raha bazm-e-kam nazar se gurez

use bhi mere hunar ka kamal hi samjho

hawa-e-subh-e-chaman aur ek bar agar

guzar gai to hamen paimal hi samjho

dilon ke zakhm chhupe hain lahu ki chadar mein

tumhen gharaz nahin tum indimal hi samjho

husul-e-kaif ko maikhana-e-hayat mein les

shikast-e-jam se pahle muhal hi samjho