اتنی مشکل میں بھی احباب نہ ڈالیں مجھ کو

اتنی مشکل میں بھی احباب نہ ڈالیں مجھ کو

کہ سنبھلنا بھی نہ چاہوں تو سنبھالیں مجھ کو

غم دوراں غم جاناں غم جاں ایک ہوئے

ڈر رہا ہوں یہ کہیں مار نہ ڈالیں مجھ کو

منفرد میری طبیعت ہے یہ حالات کہیں

روش عام کے سانچے میں نہ ڈھالیں مجھ کو

میں تو اس پر بھی ہوں راضی کہ ترے شہر کے لوگ

میرے بنتے نہیں اپنا ہی بنا لیں مجھ کو

آپ مجھ سے کسی تعبیر کی پھر بات کریں

پہلے اس خواب تمنا سے جگا لیں مجھ کو

نہیں معلوم کہ کل تک میں رہوں یا نہ رہوں

مہرباں آج ہی جی بھر کے ستا لیں مجھ کو

گردشوں کے لئے اب تک نہ یہ ممکن نہ ہوا

کسی صورت مرے محور سے ہٹا لیں مجھ کو

ان بلندی کے مکینوں کو میسر ہی نہیں

لیثؔ وہ ہاتھ جو پستی سے اٹھا لیں مجھ کو

itni mushkil mein bhi ahbab na dalen mujh ko

ke sambhalna bhi na chahun to sambhalen mujh ko

gham-e-dauran gham-e-janan gham-e-jan ek hue

dar raha hun ye kahin mar na dalen mujh ko

munfarid meri tabiat hai ye halat kahin

rawish-e-am ke sanche mein na dhalen mujh ko

main to us par bhi hun razi ke tire shahr ke log

mere bante nahin apna hi bana len mujh ko

ap mujh se kisi taabir ki phir bat karen

pahle is khwab-e-tamanna se jaga len mujh ko

nahin maalum ke kal tak main rahun ya na rahun

mehrban aj hi ji bhar ke sata len mujh ko

gardishon ke liye ab tak na ye mumkin na hua

kisi surat mire mehwar se hata len mujh ko

un bulandi ke makinon ko muyassar hi nahin

les wo hath jo pasti se utha len mujh ko