مہرباں کس پہ ہیں اب اہل جفا میرے بعد

مہرباں کس پہ ہیں اب اہل جفا میرے بعد

کس کے خرمن پہ گری برق بلا میرے بعد

اے نسیم سحری یہ تو بتا کیسے ہیں

وہ مرے ہم نفس و شعلہ نوا میرے بعد

گرد آلام سے اب کس کی جبیں دھلتی ہے

کس کے رخ پر ہے مصائب کی جلا میرے بعد

کون اب مرحلۂ دار و رسن تک پہنچا

کیا ہے اب شیوۂ ارباب وفا میرے بعد

کس نے کی جرأت رندانۂ تجدید حیات

کون وقف غم ایام ہوا میرے بعد

کون ہے جو پس دیوار قفس سنتا ہے

اہل زنداں جرس گل کی صدا میرے بعد

بزم شاہی میں بصد جاہ و حشم کون گیا

دوش پر اپنے لئے حق کی ردا میرے بعد

مصحف روئے دل آرام نگار گیتی

کون پڑھتا ہے بصد صدق و صفا میرے بعد

زہر غم ہوتا ہے اب کس کو گوارا دیکھیں

ہے مکرر لب ساقی پہ صدا میرے بعد

mehrban kis pe hain ab ahl-e-jafa mere baad

kis ke khirman pe giri barq-e-bala mere baad

ai nasim-e-sahari ye to bata kaise hain

wo mire ham nafas-o-shola nawa mere baad

gard-e-alam se ab kis ki jabin dhulti hai

kis ke rukh par hai masaib ki jala mere baad

kaun ab marhala-e-dar-o-rasan tak pahuncha

kya hai ab shewa-e-arbab-e-wafa mere baad

kis ne ki jurat-e-rindana-e-tajdid-e-hayat

kaun waqf-e-gham-e-ayyam hua mere baad

kaun hai jo pas-e-diwar-e-qafas sunta hai

ahl-e-zindan jaras-e-gul ki sada mere baad

bazm-e-shahi mein basad jah-o-hasham kaun gaya

dosh par apne liye haq ki rida mere baad

mushaf-e-ru-e-dil aram nigar-e-giti

kaun parhta hai basad sidq-o-safa mere baad

zahr-e-gham hota hai ab kis ko gawara dekhen

hai mukarrar lab-e-saqi pe sada mere baad