زیست کی تاریک راہوں میں دیا کوئی نہیں

زیست کی تاریک راہوں میں دیا کوئی نہیں

اس سفر میں جز غم دل رہنما کوئی نہیں

ہم کسی اسکندر و دارا کا کھائیں کیوں فریب

ہم قلندر ہیں ہمارا مدعا کوئی نہیں

ایک تم ساری خدائی جس کی ہے حلقہ بگوش

اور میرے ظلمت کدہ میں دوسرا کوئی نہیں

کون اس نقار خانے میں سنے گا دوستو

اک شکستہ شیشۂ دل کی صدا کوئی نہیں

کس سے تجھ کو اے غم جاناں بھلا تشبیہ دیں

اتنی دل کش تو دھنک خوشبو صبا کوئی نہیں

اے بتان شہر اس وضع کہن کو کیا ہوا

تم میں اب عشوہ طراز و کج ادا کوئی نہیں

میں نے خود اپنی اسیری شوق سے منظور کی

دوستو صیاد کی اس میں خطا کوئی نہیں

خاک پائے گل رخاں آوارۂ کوئے بتاں

ان دنوں جابرؔ سا مرد پارسا کوئی نہیں

zist ki tarik rahon mein diya koi nahin

is safar mein juz gham-e-dil rahnuma koi nahin

ham kisi iskandar-o-dara ka khaen kyun fareb

ham qalandar hain hamara muddaa koi nahin

ek tum sari khudai jis ki hai halqa bagosh

aur mere zulmat kada mein dusra koi nahin

kaun is naqqar khane mein sunega dosto

ik shikasta shisha-e-dil ki sada koi nahin

kis se tujh ko ai gham-e-janan bhala tashbih den

itni dil kash to dhanak khushbu saba koi nahin

ai butan-e-shahr is waz-e-kuhan ko kya hua

tum mein ab ishwa taraz-o-kaj ada koi nahin

main ne khud apni asiri shauq se manzur ki

dosto sayyad ki is mein khata koi nahin

khak pae gul rukhan awara-e-ku-e-butan

in dinon jabir sa mard-e-parsa koi nahin