لہو کی مے بنائی دل کا پیمانہ بنا ڈالا

لہو کی مے بنائی دل کا پیمانہ بنا ڈالا

جگر داروں نے مقتل کو بھی مے خانہ بنا ڈالا

ہمارے جذبۂ تعمیر کی کچھ داد دو یارو

کہ ہم نے بجلیوں کو شمع کا شانہ بنا ڈالا

ستم ڈھاتے ہو لیکن لطف کا احساس ہوتا ہے

اسی انداز نے دنیا کو دیوانہ بنا ڈالا

بھری محفل میں ہم نے بات کر لی تھی ان آنکھوں سے

بس اتنی بات کا یاروں نے افسانہ بنا ڈالا

مرے ذوق پرستش کی کرشمہ سازیاں دیکھو

کبھی کعبہ کبھی کعبہ کو بت خانہ بنا ڈالا

شکایت بجلیوں سے ہے نہ شکوہ باد صرصر سے

چمن کو خود چمن والوں نے ویرانہ بنا ڈالا

چلو اچھا ہوا دنیا حفیظؔ اب دور ہے ہم سے

محبت نے ہمیں دنیا سے بیگانہ بنا ڈالا

lahu ki mai banai dil ka paimana bana dala

jigar daron ne maqtal ko bhi mai khana bana dala

hamare jazba-e-taamir ki kuchh dad do yaro

ke ham ne bijliyon ko shama ka shana bana dala

sitam dhate ho lekin lutf ka ehsas hota hai

isi andaz ne duniya ko diwana bana dala

bhari mahfil mein ham ne bat kar li thi in ankhon se

bas itni bat ka yaron ne afsana bana dala

mire zauq-e-parastish ki karishma saziyan dekho

kabhi kaaba kabhi kaaba ko but khana bana dala

shikayat bijliyon se hai na shikwa bad-e-sarsar se

chaman ko khud chaman walon ne wirana bana dala

chalo achchha hua duniya hafiz ab dur hai ham se

mohabbat ne hamen duniya se begana bana dala