ہم جو دیوار پہ تصویر بنانے لگ جائیں

ہم جو دیوار پہ تصویر بنانے لگ جائیں

تتلیاں آ کے ترے رنگ چرانے لگ جائیں

پھر نہ ہو مخملی تکیے کی ضرورت مجھ کو

تیرے بازو جو کبھی میرے سرہانے لگ جائیں

چاند تاروں میں بھی تب نور اضافی ہو جائے

چھت پہ جب ذکر ترا یار سنانے لگ جائیں

چند سکوں پہ تم اترائے ہوئے پھرتے ہو

ہاتھ مفلس کے کہیں جیسے خزانے لگ جائیں

کیوں نہ پھر شاخ شجر پھول سبھی مرجھائیں

بھائی جب صحن میں دیوار اٹھانے لگ جائیں

اس نے دو لفظ میں جو باتیں کہیں تھی مجھ سے

اس کو میں سوچنے بیٹھوں تو زمانے لگ جائیں

پھر زمانے میں نہ ہو کوئی پریشاں نادمؔ

تیرے جیسے بھی نکمے جو کمانے لگ جائیں

ham jo diwar pe taswir banane lag jaen

titliyan a ke tire rang churane lag jaen

phir na ho makhmali takiye ki zarurat mujh ko

tere bazu jo kabhi mere sirhane lag jaen

chand taron mein bhi tab nur izafi ho jae

chhat pe jab zikr tira yar sunane lag jaen

chand sakun pe tum itrae hue phirte ho

hath muflis ke kahin jaise khazane lag jaen

kyun na phir shakh-e-shajar phul sabhi murjhaen

bhai jab sehn mein diwar uthane lag jaen

us ne do lafz mein jo baten kahin thi mujh se

us ko main sochne baithun to zamane lag jaen

phir zamane mein na ho koi pareshan nadim

tere jaise bhi nikamme jo kamane lag jaen