خواب تیرے ہیں یہ خوابوں کا نگر تیرا ہے

خواب تیرے ہیں یہ خوابوں کا نگر تیرا ہے

ذکر انفاس میں ہر شام و سحر تیرا ہے

جلوہ ہر گام سر راہ گزر تیرا ہے

آنکھ میری ہے مگر حسن نظر تیرا ہے

بے ارادہ جو اٹھے ہیں وہ قدم میرے ہیں

بے محابا جو گزرتا ہے سفر تیرا ہے

میری بے ربط دعاؤں کو رسائی دے دے

لفظ میرے ہیں مگر باب اثر تیرا ہے

زندگی کہتا ہوں میں جس کو زباں میں اپنی

وہ سفر میرا سہی اذن سفر تیرا ہے

سرحدیں ہیں مری نظروں کی یہ مہر و مہتاب

اور ان سے بھی جو آگے ہے وہ در تیرا ہے

نسل و مذہب کی کوئی قید نہیں ہے گوہرؔ

ذکر ہر لب پہ بہ الفاظ دگر تیرا ہے

khwab tere hain ye khwabon ka nagar tera hai

zikr anfas mein har sham-o-sahar tera hai

jalwa har gam sar-e-rah guzar tera hai

ankh meri hai magar husn-e-nazar tera hai

be irada jo uthe hain wo qadam mere hain

be muhaba jo guzarta hai safar tera hai

meri be rabt duaon ko rasai de de

lafz mere hain magar bab-e-asar tera hai

zindagi kahta hun main jis ko zaban main apni

wo safar mera sahi izn-e-safar tera hai

sarhaden hain miri nazron ki ye mehr-o-mahtab

aur un se bhi jo age hai wo dar tera hai

nasl-o-mazhab ki koi qaid nahin hai gauhar

zikr har lab pe ba alfaz-e-digar tera hai