اب صلیبیں شاہراہوں پر سجا دی جائیں گی

اب صلیبیں شاہراہوں پر سجا دی جائیں گی

عکس رہ جائیں گے تصویریں ہٹا دی جائیں گی

بات کرنے کو ترس جائیں گے ارباب وفا

بندشیں اتنی زبانوں پر لگا دی جائیں گی

جن کتابوں میں وفا کا ذکر آئے گا نظر

صبر کیجے وہ کتابیں بھی جلا دی جائیں گی

آپ اور تم کا تصور بھی فنا ہو جائے گا

جتنی قدریں ہیں ادب کی سب مٹا دی جائیں گی

منتظر رہئے محبت کا پیمبر آئے گا

جتنی شمعیں بجھ چکی ہیں سب جلا دی جائیں گی

پی رہے ہیں جن میں گوہرؔ لوگ انساں کا لہو

ایسی تعمیروں کی بنیادیں ہلا دی جائیں گی

ab saliben shahrahon par saja di jaengi

aks rah jaenge taswiren hata di jaengi

bat karne ko taras jaenge arbab-e-wafa

bandishen itni zabanon par laga di jaengi

jin kitabon mein wafa ka zikr aega nazar

sabr kije wo kitaben bhi jala di jaengi

ap aur tum ka tasawwur bhi fana ho jaega

jitni qadren hain adab ki sab mita di jaengi

muntazir rahiye mohabbat ka payambar aega

jitni shamen bujh chuki hain sab jala di jaengi

pi rahe hain jin mein gauhar log insan ka lahu

aisi taamiron ki buniyaden hila di jaengi