Arooz is now on the App Store, for iPhone and iPad. Download →

All poetry

یا رب دل و نظر پہ مسلط کبھی نہ ہو

Gauhar Usmani (1924–2004)

یا رب دل و نظر پہ مسلط کبھی نہ ہو

وہ بے خودی کہ جس میں شعور خودی نہ ہو

اتنا نہ دور جاؤ حد اختلاف سے

ممکن ہے پھر وہاں سے کبھی واپسی نہ ہو

دل میں خلوص ہو تو ہو اک مستقل خلوص

وہ کیا خلوص ہے جو کبھی ہو کبھی نہ ہو

ترک تعلقات کی اک شرط یہ بھی تھی

دل ٹوٹ جائے اور کوئی آواز بھی نہ ہو

جی چاہتا ہے پھولوں سے کچھ گفتگو کروں

پھر سوچتا ہوں باد صبا دیکھتی نہ ہو

گوہرؔ دل و نگاہ میں اک فصل تو رہے

لیکن دل و نظر کا تصادم کبھی نہ ہو