گمراہ کہہ کے پہلے جو مجھ سے خفا ہوئے

گمراہ کہہ کے پہلے جو مجھ سے خفا ہوئے

آخر وہ میرے نقش قدم پر فدا ہوئے

اب تک تو زندگی سے تعارف نہ تھا کوئی

تم سے ملے تو زیست سے بھی آشنا ہوئے

ایسا نہیں کہ دل ہی مقابل نہیں رہا

تیر نگاہ ناز بھی اکثر خطا ہوئے

میری نظر نے تم کو جمال آشنا کیا

مجھ کو دعائیں دو کہ تم اک آئنہ ہوئے

کیا ہوگا اس سے بڑھ کے کوئی ربط باہمی

منزل ہماری وہ تو ہم ان کا پتا ہوئے

اب کیا بتائیں کس کی نگاہوں کی دین تھی

وہ مے کہ جس کے پیتے ہی ہم پارسا ہوئے

سنتا ہوں اک مقام زیارت ہے آج کل

وہ زندگی کا موڑ جہاں ہم جدا ہوئے

وہ آ گئے دوائے غم جاں لیے ہوئے

لو آج ہم بھی قائل دست دعا ہوئے

کب زندگی نے ہم کو نوازا نہیں حفیظؔ

کب ہم پہ باب لطف و عنایت نہ وا ہوئے

gumrah kah ke pahle jo mujh se khafa hue

akhir wo mere naqsh-e-qadam par fida hue

ab tak to zindagi se taaruf na tha koi

tum se mile to zist se bhi ashna hue

aisa nahin ke dil hi muqabil nahin raha

tir-e-nigah-e-naz bhi aksar khata hue

meri nazar ne tum ko jamal-e-ashna kiya

mujh ko duaen do ke tum ik aina hue

kya hoga is se barh ke koi rabt-e-bahami

manzil hamari wo to ham un ka pata hue

ab kya bataen kis ki nigahon ki din thi

wo mai ke jis ke pite hi ham parsa hue

sunta hun ik maqam ziyarat hai aj kal

wo zindagi ka mor jahan ham juda hue

wo a gae dawa-e-gham-e-jan liye hue

lo aj ham bhi qail-e-dast-e-dua hue

kab zindagi ne ham ko nawaza nahin hafiz

kab ham pe bab-e-lutf-o-inayat na wa hue