جہاں چھیڑ دے کوئی ان کا فسانہ

جہاں چھیڑ دے کوئی ان کا فسانہ

ہمہ رنگ لفظوں کی جنت سجانا

تمہارے ہمارے ہی دم سے ہے روشن

دل و جاں کی رنگینیوں کا زمانہ

یہ کیسی ادا ہے بہ طرز محبت

کبھی یاد رکھنا کبھی بھول جانا

ہمیں چاہئے صرف تیرا تصور

اگرچہ یہ دنیا ہے تصویر خانہ

ہر اک تیرے حسن تصور کا شیدا

ہو ادنیٰ و اعلیٰ کہ نادان و دانا

طلوع سحر ہے کہ تم سامنے ہو

یہ کندن سا مکھڑا یہ گیسو یہ شانہ

ترے دور نے تجھ سے مانگی محبت

محبت نے بخشا تجھے مسکرانا

jahan chher de koi un ka fasana

hama rang lafzon ki jannat sajana

tumhare hamare hi dam se hai raushan

dil-o-jan ki ranginiyon ka zamana

ye kaisi ada hai ba tarz-e-mohabbat

kabhi yad rakhna kabhi bhul jana

hamen chahiye sirf tera tasawwur

agarche ye duniya hai taswir khana

har ik tere husn-e-tasawwur ka shaida

ho adna-o-aala ke nadan-o-dana

tulu-e-sahar hai ke tum samne ho

ye kundan sa mukhra ye gesu ye shana

tire dur ne tujh se mangi mohabbat

mohabbat ne bakhsha tujhe muskurana