ترے نگاہ کرم جب بکھر گئی ہوگی

ترے نگاہ کرم جب بکھر گئی ہوگی

کسی غریب کی دنیا سنور گئی ہوگی

تجھی کو ڈھونڈھتی پھرتی ہیں در بدر آنکھیں

ازل کے روز تجھی پر نظر گئی ہوگی

سکوت ساز دوعالم سنائی دیتا ہے

ترے فراق میں دنیا ٹھہر گئی ہوگی

سحر کے چاہنے والے کا کیا ہوا ہوگا

بہ نام تیرہ شبی جب سحر گئی ہوگی

وہ اک خبر کہ جو رسوائیوں کا باعث تھی

ہزار رنگ میں وہ اک خبر گئی ہوگی

سحر کے نرم و خنک دودھیا اجالوں میں

ترے جمال کی رنگت بکھر گئی ہوگی

یہ شش جہت ہے ترے قاتلوں کا دیس تو پھر

ترے خلوص کی ارتھی کدھر گئی ہوگی

tire nigah-e-karam jab bikhar gai hogi

kisi gharib ki duniya sanwar gai hogi

tujhi ko dhundhti phirti hain dar badar ankhen

azal ke roz tujhi par nazar gai hogi

sukut saz doalam sunai deta hai

tire firaq mein duniya thahar gai hogi

sahar ke chahne wale ka kya hua hoga

ba nam tira shabi jab sahar gai hogi

wo ik khabar ke jo ruswaiyon ka bais thi

hazar rang mein wo ik khabar gai hogi

sahar ke narm-o-khunuk dudhiya ujalon mein

tire jamal ki rangat bikhar gai hogi

ye shash jihat hai tire qatilon ka des to phir

tire khulus ki arthi kidhar gai hogi