ان کے عارض پہ اشکوں کے دھارے

ان کے عارض پہ اشکوں کے دھارے

جیسے پھولوں کو شبنم سنوارے

غم نہ کر اس جہان طلب میں

ٹوٹ جاتے ہیں اکثر سہارے

تم نے منطق سے الفت کو سمجھا

تم ہی جیتے چلو ہم ہی ہارے

غم کی زحمت میں کیا کچھ نہ بیتی

رات کاٹی ہے گن گن کے تارے

چھوڑ کر مجھ کو بحر الم میں

تیری کشتی گئی ہے کنارے

اس کو فخر محبت نہ کیوں ہو

دورؔ دل میں رہا ہے تمہارے

un ke ariz pe ashkon ke dhare

jaise phulon ko shabnam sanware

gham na kar is jahan-e-talab mein

tut jate hain aksar sahare

tum ne mantiq se ulfat ko samjha

tum hi jite chalo ham hi hare

gham ki zahmat mein kya kuchh na biti

rat kati hai gin gin ke tare

chhor kar mujh ko bahr-e-alam mein

teri kashti gai hai kinare

us ko fakhr-e-mohabbat na kyun ho

dur dil mein raha hai tumhare