دل کی آواز میں آواز ملاتے رہیے

دل کی آواز میں آواز ملاتے رہیے

جاگتے رہیے زمانے کو جگاتے رہیے

دولت عشق نہیں باندھ کے رکھنے کے لیے

اس خزانے کو جہاں تک ہو لٹاتے رہیے

زندگی بھی کسی محبوب سے کچھ کم تو نہیں

پیار ہے اس سے تو پھر ناز اٹھاتے رہیے

زندگی درد کی تصویر نہ بننے پائے

بولتے رہیے ذرا ہنستے ہنساتے رہیے

روٹھنا بھی ہے حسینوں کی ادا میں شامل

آپ کا کام منانا ہے مناتے رہیے

پھول بکھراتا ہوا میں تو چلا جاؤں گا

آپ کانٹے مری راہوں میں بچھاتے رہیے

بے وفائی کا زمانہ ہے مگر آپ حفیظؔ

نغمۂ مہر و وفا سب کو سناتے رہیے

dil ki awaz mein awaz milate rahiye

jagte rahiye zamane ko jagate rahiye

daulat-e-ishq nahin bandh ke rakhne ke liye

is khazane ko jahan tak ho lutate rahiye

zindagi bhi kisi mahbub se kuchh kam to nahin

pyar hai us se to phir naz uthate rahiye

zindagi dard ki taswir na banne pae

bolte rahiye zara hanste hansate rahiye

ruthna bhi hai hasinon ki ada mein shamil

ap ka kam manana hai manate rahiye

phul bikharita hawa mein to chala jaunga

ap kante miri rahon mein bichhate rahiye

be wafai ka zamana hai magar ap hafiz

naghma-e-mehr-o-wafa sab ko sunate rahiye