دامن گل میں وہ تھی اشک فشانی کی طرح

دامن گل میں وہ تھی اشک فشانی کی طرح

میں نے چاہا تھا جسے رات کی رانی کی طرح

مثل خواہش جنہیں میں رکھتا ہوں افسوس کہ وہ

میری یادیں بھی نہیں رکھتے نشانی کی طرح

اس کو سمجھاؤں تو کیسے جو رہا دل میں مرے

نہ ہی الفاظ کی صورت نہ معانی کی طرح

فن کا دعویٰ وہ کیا کرتے ہیں حیرت ہے مجھے

غالبؔ و ذوقؔ کے جیسے ہیں نہ فانیؔ کی طرح

کربلا میں جو مدینے کے مسافر پہونچے

خون پھر ان کا بہایا گیا پانی کی طرح

فیضؔ غزلوں کو سلیقے سے سنوارا میں نے

میرا ہر شعر ہے دریا کی روانی کی طرح

daman-e-gul mein wo thi ashk fishani ki tarah

main ne chaha tha jise rat ki rani ki tarah

misl-e-khwahish jinhen mein rakhta hun afsos ke wo

meri yaden bhi nahin rakhte nishani ki tarah

us ko samjhaun to kaise jo raha dil mein mire

na hi alfaz ki surat na maani ki tarah

fan ka daawa wo kiya karte hain hairat hai mujhe

ghalib-o-zauq ke jaise hain na fani ki tarah

karbala mein jo madine ke musafir pahunche

khun phir un ka bahaya gaya pani ki tarah

faiz ghazlon ko saliqe se sanwara main ne

mera har sher hai dariya ki rawani ki tarah