تمہاری یاد میں آنکھیں بھگو رہا ہوں میں

تمہاری یاد میں آنکھیں بھگو رہا ہوں میں

مگر زمانہ سمجھتا ہے رو رہا ہوں میں

کمال یہ ہے کہ خود اپنے دل کے تاروں میں

حسین عشق کے موتی پرو رہا ہوں میں

کٹی ہے عمر یہ ساری بتوں کی الفت میں

مگر اب اپنے گناہوں کو دھو رہا ہوں میں

مرے یقین کا اس سے ہی امتحاں ہوگا

بھنور میں عشق کے کشتی ڈبو رہا ہوں میں

ملے تو اس کو نشانی وہ دوں محبت کی

اٹھا کے شانے پہ اپنے جو ڈھو رہا ہوں میں

خیال آبلہ پائی ہے ہر قدم مجھ کو

سو اپنی راہ میں کانٹے بھی بو رہا ہوں میں

لگا رہے ہیں وہ مہندی خوشی کی ہاتھوں میں

سکون دل کا مگر فیضؔ کھو رہا ہوں میں

tumhari yad mein ankhen bhigo raha hun main

magar zamana samajhta hai ro raha hun main

kamal ye hai ke khud apne dil ke taron mein

hasin ishq ke moti piro raha hun main

kati hai umr ye sari buton ki ulfat mein

magar ab apne gunahon ko dho raha hun main

mire yaqin ka us se hi imtihan hoga

bhanwar mein ishq ke kashti dubo raha hun main

mile to us ko nishani wo dun mohabbat ki

utha ke shane pe apne jo dho raha hun main

khayal abla pai hai har qadam mujh ko

so apni rah mein kante bhi bu raha hun main

laga rahe hain wo mehndi khushi ki hathon mein

sukun-e-dil ka magar faiz kho raha hun main