نشہ ہے تیری نگاہوں میں شرابوں کی طرح

نشہ ہے تیری نگاہوں میں شرابوں کی طرح

لوگ سرشار ہیں بے خود ہیں خرابوں کی طرح

چاند پر چھائے ہوئے ہلکے سے کالے بادل

مجھ کو لگتے ہیں ترے رخ پہ نقابوں کی طرح

سایۂ زلف میں گزرے ہوئے وہ شام و سحر

آج بھی یاد ہیں ٹوٹے ہوئے خوابوں کی طرح

اپنے دامن میں چھپا لے مرے آنسو کوئی

یہ گہر ٹوٹ بھی جاتے ہیں حبابوں کی طرح

احتیاط نگہ ناز تو دیکھے کوئی

مجھ پہ ہوتا ہے کرم بھی تو عتابوں کی طرح

جانئے گا کہ نہیں درد محبت جن میں

دل وہ بے جان سے ہیں ٹوٹے ربابوں کی طرح

کیسے بھولیں انہیں دنیا کہ وفا کے قصے

جاوداں ہوتے ہیں مذہب کی کتابوں کی طرح

شیخ کس شان سے پیتے ہیں مئے ناب طہور

پھر بھی بدنام نہیں ہم سے خرابوں کی طرح

آج بھی پیار کی راہوں میں بچھڑ کر تجھ سے

ڈھونڈھتا ہوں میں تجھے خانہ خرابوں کی طرح

جرم الفت پہ ظفرؔ مجھ کو ندامت کیوں ہو

یہ وہ لغزش ہے جو افضل ہے ثوابوں کی طرح

nasha hai teri nigahon mein sharabon ki tarah

log sarshar hain be khud hain kharabon ki tarah

chand par chhae hue halke se kale badal

mujh ko lagte hain tire rukh pe naqabon ki tarah

saya-e-zulf mein guzre hue wo sham-o-sahar

aj bhi yad hain tute hue khwabon ki tarah

apne daman mein chhupa le mire ansu koi

ye guhar tut bhi jate hain hababon ki tarah

ehtiyat-e-nigah-e-naz to dekhe koi

mujh pe hota hai karam bhi to itabon ki tarah

janiyega ke nahin dard-e-mohabbat jin mein

dil wo be jan se hain tute rababon ki tarah

kaise bhulen unhen duniya ke wafa ke qisse

jawedan hote hain mazhab ki kitabon ki tarah

shaikh kis shan se pite hain mai-e-nab tahur

phir bhi badnam nahin ham se kharabon ki tarah

aj bhi pyar ki rahon mein bichhar kar tujh se

dhundhta hun main tujhe khana kharabon ki tarah

jurm-e-ulfat pe zafar mujh ko nadamat kyun ho

ye wo laghzish hai jo afzal hai sawabon ki tarah