جب مری سمت حسیں یادوں کے پتھر برسے

جب مری سمت حسیں یادوں کے پتھر برسے

خیر مقدم کو چلے اشک بھی چشم تر سے

یوں کوئی شیش محل کر گیا دل کا ویراں

جس طرح چل دے کوئی روٹھ کے اپنے گھر سے

دل میں یوں ذہن سے در آتی ہے یاد ماضی

گھر میں جس طرح سے اترے کوئی زینے پر سے

دل کو اظہار تمنا کی تمنا تھی بہت

لب مگر ہل نہ سکے اہل جہاں کے ڈر سے

ترک الفت کا کوئی رد عمل تو دیکھے

بولنا چھوڑ دیا میں نے زمانے بھر سے

دل میں مدت سے محبت کی ہے جھنکار نہ گونج

لاؤ اس شیشے کو ٹکرائیں کسی پتھر سے

آج تک مجھ کو بلاتی ہیں صدائیں اس کی

جس نے لوٹایا تھا اک دن مجھے اپنے در سے

یہ محبت کی سزا جان ہی لے لے نہ ظفرؔ

ہم تو اک عمر سے صورت کو بھی اس کی ترسے

jab miri samt hasin yadon ke patthar barse

khair maqdam ko chale ashk bhi chashm-e-tar se

yun koi shish mahal kar gaya dil ka wiran

jis tarah chal de koi ruth ke apne ghar se

dil mein yun zehn se dar ati hai yad mazi

ghar mein jis tarah se utre koi zine par se

dil ko izhar-e-tamanna ki tamanna thi bahut

lab magar hal na sake ahl-e-jahan ke dar se

tark-e-ulfat ka koi rad-e-amal to dekhe

bolna chhor diya main ne zamane bhar se

dil mein muddat se mohabbat ki hai jhankar na gunj

lao is shishe ko takraen kisi patthar se

aj tak mujh ko bulati hain sadaen us ki

jis ne lautaya tha ik din mujhe apne dar se

ye mohabbat ki saza jan hi le le na zafar

ham to ik umr se surat ko bhi us ki tarse