Arooz is now on the App Store, for iPhone and iPad. Download →

All poetry

کسی کی یاد میں مثل چراغ رہ گزر تنہا

Zafar Sambhali (b. 1944)

کسی کی یاد میں مثل چراغ رہ گزر تنہا

گزاری ہے شب غم ہم نے اکثر جاگ کر تنہا

محبت میں ہماری زندگی کا اب یہ عالم ہے

گلستاں میں ہو جیسے کوئی سوکھا سا شجر تنہا

ہمیں پر تہمت دیوانگی ہے کس لیے آخر

ہمیں پر تو نہ تھا اے دل محبت کا اثر تنہا

کہیں ایسا نہ ہو اک دن یہ سوتے خشک ہو جائیں

محبت کے ہزاروں غم ہیں میری چشم تر تنہا

کسی کا ساتھ ہو تو زندگی جنت بداماں ہے

جہنم سے بھی بد تر ہے مگر گزرے اگر تنہا

کیا تھا عہد جن راہوں پہ ہم نے ساتھ چلنے کا

وہ راہیں ہنس رہی ہیں آج مجھ کو دیکھ کر تنہا

حوادث میں دل برباد کا عالم ارے توبہ

ہوا کے رخ پہ ہو جیسے چراغ رہ گزر تنہا

کہاں پر ختم ہو کب ختم ہو یہ وقت ہی جانے

سفر کر تو رہا ہوں زندگی کا میں ظفرؔ تنہا