Arooz is now on the App Store, for iPhone and iPad. Download →

All poetry

گیسوؤں کے اسیر ہیں ہم بھی

Zafar Sambhali (b. 1944)

گیسوؤں کے اسیر ہیں ہم بھی

قصۂ دل پذیر ہیں ہم بھی

حسن میں تم سا گر نہیں کوئی

عشق میں بے نظیر ہیں ہم بھی

مثل شیریں اگر حسین ہو تم

خالق جوئے شیر ہیں ہم بھی

اس کے ہاتھوں میں جو نہیں ملتی

ایک ایسی لکیر ہیں ہم بھی

چاند کو دیکھ کر کہا اس نے

رشک بدر منیر ہیں ہم بھی

بے وفا سے کوئی گلہ نہ کیا

کس قدر با ضمیر ہیں ہم بھی

آنسوؤں کے دیے جلاتے ہیں

روشنی کے سفیر ہیں ہم بھی

وہ کہیں بھی ہوں دیکھ لیتے ہیں

کتنے روشن ضمیر ہیں ہم بھی

جس کی نظروں میں کچھ نہیں شاہی

ایک ایسے فقیر ہیں ہم بھی

کوئی ہم سا نہیں زمانے میں

آپ اپنی نظیر ہیں ہم بھی

پاس دولت نہیں تو کیا یارو

اپنے دل کے امیر ہیں ہم بھی

نرم دل ہیں مگر عدو کے لئے

ایک زہریلا تیر ہیں ہم بھی

متحد آج ہم نہیں یارو

یوں جہاں ہیں حقیر ہیں ہم بھی

نظم گلشن بدل تو سکتے ہیں

مصلحت کے اسیر ہیں ہم بھی

شعر پر درد ہیں ظفرؔ اپنے

اس زمانے کے میرؔ ہیں ہم بھی