ہم نے دیکھے تھے کبھی خواب سہانے کیا کیا

ہم نے دیکھے تھے کبھی خواب سہانے کیا کیا

یاد آتے ہیں وہی گزرے زمانے کیا کیا

درد دل یاس و الم حسرت و ارماں آنسو

دفن ہیں دل کے خرابے میں خزانے کیا کیا

تیری یادیں تری چاہت تری فرقت ترا غم

تو نے بخشے مجھے رونے کے بہانے کیا کیا

دل میں روشن ہی رہے تیری محبت کے چراغ

آندھیاں آتی رہیں ان کو بجھانے کیا کیا

ہیں وہ دنیا کی نگاہوں میں عجائب خانے

لوگ بھی چھوڑ گئے قصر پرانے کیا کیا

اہل دل اب بھی تڑپ اٹھتے ہیں سن کر ان کو

ہیں زمانے میں محبت کے فسانے کیا کیا

دشت و صحرا پہ ہی موقوف نہیں ہے ہم نے

جستجو میں تری دیکھے ہیں ٹھکانے کیا کیا

سنگ باری سے نوازا ہے ترے شہر نے جب

روئے ہیں میرے لئے آئنہ خانے کیا کیا

یاد ماضی نے مجھے جب بھی ستایا ہے ظفرؔ

ایک لمحے میں سمٹ آئے زمانے کیا کیا

ham ne dekhe the kabhi khwab suhane kya kiya

yad ate hain wahi guzre zamane kya kiya

dard-e-dil yas-o-alam hasrat-o-arman ansu

dafn hain dil ke kharabe mein khazane kya kiya

teri yaden tiri chahat tiri furqat tira gham

tu ne bakhshe mujhe rone ke bahane kya kiya

dil mein raushan hi rahe teri mohabbat ke charagh

andhiyan ati rahen un ko bujhane kya kiya

hain wo duniya ki nigahon mein ajaib khane

log bhi chhor gae qasr purane kya kiya

ahl-e-dil ab bhi tarap uthte hain sun kar un ko

hain zamane mein mohabbat ke fasane kya kiya

dasht-o-sahra pe hi mauquf nahin hai ham ne

justuju mein tiri dekhe hain thikane kya kiya

sang bari se nawaza hai tire shahr ne jab

roe hain mere liye aina khane kya kiya

yad mazi ne mujhe jab bhi sataya hai zafar

ek lamhe mein simat ae zamane kya kiya