آنکھ کیا غم میں ترے نم سی ہوئی جاتی ہے

آنکھ کیا غم میں ترے نم سی ہوئی جاتی ہے

زندگی شعلہ تھی شبنم سی ہوئی جاتی ہے

بدلے بدلے وہ نظر آنے لگے ہیں جب سے

ان کو پانے کی طلب کم سی ہوئی جاتی ہے

کیا محبت ہے یہی جب سے تجھے دیکھا ہے

اک خلش سینے میں پیہم سی ہوئی جاتی ہے

جب سے اس دل کو غم یار ملا ہے یارو

زندگی اور بھی محکم سی ہوئی جاتی ہے

آج پھر دل نے لیا ہے تری یادوں کا اثر

آج پھر آنکھ مری نم سی ہوئی جاتی ہے

میرے ہاتھوں نے سکھایا تھا سنورنا جس کو

آج وہ زلف بھی برہم سی ہوئی جاتی ہے

جب سے وہ میرے تصور میں لگے ہیں آنے

میری ہر شام شب غم سی ہوئی جاتی ہے

جب سے الفت کا اثر ہونے لگا ہے اس پر

اس کی حالت بھی ظفرؔ ہم سی ہوئی جاتی ہے

ankh kya gham mein tire nam si hui jati hai

zindagi shola thi shabnam si hui jati hai

badle badle wo nazar ane lage hain jab se

un ko pane ki talab kam si hui jati hai

kya mohabbat hai yahi jab se tujhe dekha hai

ik khalish sine mein paiham si hui jati hai

jab se is dil ko gham-e-yar mila hai yaro

zindagi aur bhi mohkam si hui jati hai

aj phir dil ne liya hai tiri yadon ka asar

aj phir ankh miri nam si hui jati hai

mere hathon ne sikhaya tha sanwarna jis ko

aj wo zulf bhi barham si hui jati hai

jab se wo mere tasawwur mein lage hain ane

meri har sham-e-shab-e-gham si hui jati hai

jab se ulfat ka asar hone laga hai us par

us ki halat bhi zafar ham si hui jati hai