اے ہم نفسو درد کی یہ رات کڑی ہے

اے ہم نفسو درد کی یہ رات کڑی ہے

سر تھامے ہوئے دل میں کہیں آس کھڑی ہے

ہم رنگ شفق ہے دل معصوم کا عالم

وہ دور تمنا کی سحر چپ کے کھڑی ہے

اجلی تھی تری یاد کی یہ زرد سی پتی

خاکستر ایام میں خاموش پڑی ہے

ان آنکھوں میں پھر دیکھا حیا رنگ تبسم

رستے میں قضا سے مری پھر آنکھ لڑی ہے

پھر دست صبا نے وہ گجر آج بجایا

پلکوں پہ پھر اک بار مری نیند اڑی ہے

پھر شہر غزالاں میں غزل لایا ہے قیصرؔ

صورت کدۂ حسن میں پھر دھوم پڑی ہے

ai ham nafaso dard ki ye rat kari hai

sar thame hue dil mein kahin as khari hai

ham rang shafaq hai dil maasum ka alam

wo dur tamanna ki sahar chup ke khari hai

ujli thi tiri yad ki ye zard si patti

khakistar-e-ayyam mein khamosh pari hai

in ankhon mein phir dekha haya rang tabassum

raste mein qaza se miri phir ankh lari hai

phir dast-e-saba ne wo gajar aj bajaya

palkon pe phir ik bar miri nind uri hai

phir shahr-e-ghazalan mein ghazal laya hai qaisar

surat kada-e-husn mein phir dhum pari hai