جب درد کی شمعیں جلتی ہیں احساس کے نازک سینے میں

جب درد کی شمعیں جلتی ہیں احساس کے نازک سینے میں

اک حسن سا شامل ہوتا ہے پھر تنہا تنہا جینے میں

کچھ لطف کی گرمی کی خاطر کچھ جان وفا کے صدقے میں

گیسوئے الم کے سائے میں راحت سی ملی ہے پینے میں

آغوش تمنا چھو آئیں جب زلف یار کی خوشبو میں

آنکھوں میں ساون لہرایا دیپک سا سلگا سینے میں

موسیقیٔ حسن کی موجیں تھی کچھ آنکھوں میں کچھ پیالوں میں

جو ساحل دل تک ہو آئیں یادوں کے ایک سفینے میں

پلکوں میں سلگتے تاروں سے میں رات کی افشاں چن نہ سکا

شعلوں کو چھپائے پھرتا ہوں میں دل کے ایک نگینے میں

وہ رنگ حیا احساس طرب آئینۂ رخ کے عکس فگن

اک تابش تیرے چہرے کی اک آنچ سی میرے سینے میں

کلیوں نے گھونگھٹ سرکائے شبنم نے موتی رول دئے

لذت سی ملی ہے اشکوں سے یہ چاک جگر کا سینے میں

نغموں کی چاندنی چھٹکی ہے شعروں کے شبستاں مہکے ہیں

پھر ساز غزل لے آیا ہوں اک لطف ہے اکثر جینے میں

jab dard ki shamen jalti hain ehsas ke nazuk sine mein

ik husn sa shamil hota hai phir tanha tanha jine mein

kuchh lutf ki garmi ki khatir kuchh jan-e-wafa ke sadqe mein

gesu-e-alam ke sae mein rahat si mili hai pine mein

aghosh-e-tamanna chhu aen jab zulf-e-yar ki khushbu mein

ankhon mein sawan lahraya dipak sa sulga sine mein

mausiqi-e-husn ki maujen thi kuchh ankhon mein kuchh pyalon mein

jo sahil dil tak ho aen yadon ke ek safine mein

palkon mein sulagte taron se main rat ki afshan chun na saka

sholon ko chhupae phirta hun main dil ke ek nagine mein

wo rang-e-haya ehsas-e-tarab aina-e-rukh ke aks fagan

ik tabish tere chehre ki ik anch si mere sine mein

kaliyon ne ghunghat sarkae shabnam ne moti rol diye

lazzat si mili hai ashkon se ye chak-e-jigar ka sine mein

naghmon ki chandni chhitki hai sheron ke shabistan mahke hain

phir saz ghazal le aya hun ik lutf hai aksar jine mein