کبھی اثر نہ مرے حرف مدعا میں رہا

کبھی اثر نہ مرے حرف مدعا میں رہا

نہ اختیار کوئی دست نارسا میں رہا

نصیب دختر حوا جفا و جور و ستم

شمار حسن و نزاکت میں اور وفا میں رہا

امیر شہر کہ تھا زعم اقتدار میں گم

غریب شہر سدا جبر ناروا میں رہا

اتر گیا رگ و پے میں وہ زہر کی مانند

مثال شہد جو اک شخص ابتدا میں رہا

میں ہو سکی نہ کبھی اپنی ذات تک محدود

ہر ایک پھول چمن کا مری دعا میں رہا

میں وہ مریض ہوں جس کے لیے نہ کوئی اثر

کسی کے حرف تسلی میں اور دعا میں رہا

وہ مجھ کو دیکھ کے کرتا رہا ہے ان دیکھا

عجیب طرز تغافل بھی اعتنا میں رہا

kabhi asar na mire harf-e-muddaa mein raha

na ikhtiyar koi dast-e-narasa mein raha

nasib dukhtar-e-hawwa jafa-o-jaur-o-sitam

shumar husn-o-nazakat mein aur wafa mein raha

amir-e-shahr ke tha zaam iqtidar mein gum

gharib-e-shahr sada jabr narawa mein raha

utar gaya rag-o-pe mein wo zahr ki manind

misal-e-shahd jo ik shakhs ibtida mein raha

main ho saki na kabhi apni zat tak mahdud

har ek phul chaman ka miri dua mein raha

main wo mariz hun jis ke liye na koi asar

kisi ke harf-e-tasalli mein aur dua mein raha

wo mujh ko dekh ke karta raha hai an dekha

ajib tarz-e-taghaful bhi etina mein raha