میں کیا مثال دوں کوئی تری مثال کے بعد

میں کیا مثال دوں کوئی تری مثال کے بعد

نہیں جمال کوئی بھی ترے جمال کے بعد

عطا ہوئی وہ بلندی مرے تخیل کو

خیال ہیچ ہوئے سب ترے خیال کے بعد

یہ تیرے نام کا صدقہ ہے صاحب معراج

عروج مجھ کو ملا ہے جو ہر زوال کے بعد

بتایا حلیہ مبارک جو ام معبد نے

حسیں لگا نہ کوئی ایسے خد و خال کے بعد

نہ لوٹا آپؐ کے در سے کوئی تہی دامن

نہ ٹوٹا مان کسی کا بیان حال کے بعد

نہیں ہے رنج کوئی جو خوشی میں ڈھل نہ گیا

درود میں نے پڑھا جب کسی ملال کے بعد

کنیز آل محمد اگر میں کہلاؤں

وصال ان سے ہی ہوگا مرا وصال کے بعد

ہے طاہرہؔ یہ تمنا دل و نگاہ کی اب

مدینے جاؤں ہمیشہ ہر ایک سال کے بعد

main kya misal dun koi tiri misal ke baad

nahin jamal koi bhi tire jamal ke baad

ata hui wo bulandi mire takhayyul ko

khayal hech hue sab tire khayal ke baad

ye tere nam ka sadqa hai sahab-e-meraj

uruj mujh ko mila hai jo har zawal ke baad

bataya hulya mubarak jo um muabbid ne

hasin laga na koi aise khad-o-khal ke baad

na lauta ap ke dar se koi tahi daman

na tuta man kisi ka bayan hal ke baad

nahin hai ranj koi jo khushi mein dhal na gaya

durud main ne parha jab kisi malal ke baad

kaniz-e-al-e-mohammad agar main kahlaun

wisal un se hi hoga mira wisal ke baad

hai tahra ye tamanna dil-o-nigah ki ab

madine jaun hamesha har ek sal ke baad