مہ و پرویں تہ کمند رہے

مہ و پرویں تہ کمند رہے

کن فضاؤں میں ہم بلند رہے

غم ہستی سے بے نیاز سہی

اہل دل پھر بھی درد مند رہے

چشم عقدہ کشا سے بھی نہ کھلے

ہم کچھ اس طرح بند بند رہے

بر سر دار ہم سہی لیکن

حرف حق کی طرح بلند رہے

حسن کی خود نمائیاں توبہ

مدتوں ہم بھی خود پسند رہے

مے و مستی نہیں ہے اس پہ حرام

میکدے میں جو ہوش مند رہے

ہم ہیں رہبر سے دو قدم آگے

حوصلے شوق سے دو چند رہے

دشمنوں کا گلا نہیں تابشؔ

دوست بھی درپئے گزند رہے

mah-o-parwin tah-e-kamand rahe

kin fazaon mein ham buland rahe

gham-e-hasti se be niyaz sahi

ahl-e-dil phir bhi dard mand rahe

chashm-e-uqda kusha se bhi na khule

ham kuchh is tarah band band rahe

bar sar-e-dar ham sahi lekin

harf-e-haq ki tarah buland rahe

husn ki khud numaiyan tauba

muddaton ham bhi khud pasand rahe

mai-o-masti nahin hai us pe haram

maikade mein jo hosh mand rahe

ham hain rahbar se do qadam age

hausle shauq se do chand rahe

dushmanon ka gila nahin tabish

dost bhi darpae gazand rahe