منزلوں کو نظر میں رکھا ہے

منزلوں کو نظر میں رکھا ہے

جب قدم رہ گزر میں رکھا ہے

اک ہیولیٰ ہے گھر خرابی کا!

ورنہ کیا خاک گھر میں رکھا ہے

ہم نے حسن ہزار شیوہ کو

جلوہ جلوہ نظر میں رکھا ہے

چاہیئے صرف ہمت پرواز

باغ تو بال و پر میں رکھا ہے

حرم و دیر سے الگ ہم نے

ابھی اک سجدہ سر میں رکھا ہے

میری ہمت نے اپنی منزل کا

فاصلہ رہ گزر میں رکھا ہے

رات دن دھوپ چھاؤں کا عالم

کیا تماشا نظر میں رکھا ہے

manzilon ko nazar mein rakha hai

jab qadam rah guzar mein rakha hai

ik hayula hai ghar kharabi ka!

warna kya khak ghar mein rakha hai

ham ne husn-e-hazar shewa ko

jalwa jalwa nazar mein rakha hai

chahiye sirf-e-himmat-e-parwaz

bagh to bal-o-par main rakha hai

haram-o-dair se alag ham ne

abhi ik sajda sar mein rakha hai

meri himmat ne apni manzil ka

fasla rah guzar mein rakha hai

rat din dhup chhaon ka alam

kya tamasha nazar mein rakha hai