دیکھیے اہل محبت ہمیں کیا دیتے ہیں

دیکھیے اہل محبت ہمیں کیا دیتے ہیں

کوچۂ یار میں ہم کب سے صدا دیتے ہیں

روز خوشبو تری لاتے ہیں صبا کے جھونکے

اہل گلشن مری وحشت کو ہوا دیتے ہیں

منزل شمع تک آسان رسائی ہو جائے

اس لیے خاک پتنگوں کی اڑا دیتے ہیں

سوئے صحرا بھی ذرا اہل خرد ہو آؤ

کچھ بہاروں کا پتا آبلہ پا دیتے ہیں

مجھ کو احباب کے الطاف و کرم نے مارا

لوگ اب زہر کے بدلے بھی دوا دیتے ہیں

ساتھ چلتا ہے کوئی اور بھی سوئے منزل

مجھ کو دھوکا مرے نقش کف پا دیتے ہیں

زندگی مرگ مسلسل ہے مگر اے تابشؔ

ہائے وہ لوگ جو جینے کی دعا دیتے ہیں

dekhiye ahl-e-mohabbat hamen kya dete hain

kucha-e-yar mein ham kab se sada dete hain

roz khushbu tiri late hain saba ke jhonke

ahl-e-gulshan miri wahshat ko hua dete hain

manzil-e-shama tak asan rasai ho jae

is liye khak patangon ki ura dete hain

su-e-sahra bhi zara ahl-e-khirad ho ao

kuchh baharon ka pata abla pa dete hain

mujh ko ahbab ke altaf-o-karam ne mara

log ab zahr ke badle bhi dawa dete hain

sath chalta hai koi aur bhi su-e-manzil

mujh ko dhoka mire naqsh-e-kaf-e-pa dete hain

zindagi marg musalsal hai magar ai tabish

hae wo log jo jine ki dua dete hain