کبھی ہوتا ہے پریشاں کبھی شرماتا ہے

کبھی ہوتا ہے پریشاں کبھی شرماتا ہے

آئینہ میرے خد و خال سے گھبراتا ہے

رینگتے رینگتے اک آہ مجھے کھینچتی ہے

اور اک خوف مرے جسم میں در آتا ہے

خود بھی میں خاک زدہ خستہ بدن ہوں پہ مجھے

اپنے کشکول کی حالت پہ ترس آتا ہے

یک بیک ایک چراغ اپنی طرف کھینچتا ہوں

اژدہا دیکھتا ہے اور لپٹ جاتا ہے

کتنا مانوس ہے مجھ سے ترے ہونٹوں کا سکوت

مسکراؤں تو مرے حلق تک آ جاتا ہے

رفتہ رفتہ مجھے جھنجھوڑتا ہے سبز خدا

جیسے دیمک کوئی لکڑی کی غذا کھاتا ہے

شام کے وقت لہو رنگ محبت کی طرح

کوئی آتا ہے رلاتا ہے چلا جاتا ہے

kabhi hota hai pareshan kabhi sharmata hai

aina mere khad-o-khal se ghabrata hai

rengte rengte ik ah mujhe khinchti hai

aur ik khauf mire jism mein dar ata hai

khud bhi main khak zada khasta badan hun pe mujhe

apne kashkol ki halat pe taras ata hai

yak bayak ek charagh apni taraf khinchta hun

azhdaha dekhta hai aur lipat jata hai

kitna manus hai mujh se tire honton ka sukut

muskuraun to mire halq tak a jata hai

rafta rafta mujhe jhinjhorta hai sabz khuda

jaise dimak koi lakri ki ghiza khata hai

sham ke waqt lahu rang mohabbat ki tarah

koi ata hai rulata hai chala jata hai