کس کا عکس نمایاں ہوگا ایسے گدلے پانی میں

کس کا عکس نمایاں ہوگا ایسے گدلے پانی میں

سورج ڈوب گیا ہے میرے آنگن کی ویرانی میں

اس گھر کی دیوار میں جانے کس کے کان پھنسے ہوں گے

صرف یہی ڈر لاحق ہے مجھ کو ہر نقل مکانی میں

ہجر کی شب روشن تھا گھر میں ایک ستارہ اور چراغ

آنکھ جھپکنے تک کا وقت نہیں تھا اس حیرانی میں

مجھ سے پہلے بھی کچھ وحشی اس الجھن میں فوت ہوئے

آخر کس کا دست جنوں ہے وحشت کی آسانی میں

سرخ اندھیرا چھٹنے کی منت کا پھیکا زرد چراغ

چھوڑ دیا ہے سانپ کسی نے جھیل کے سادہ پانی میں

جیسے کسی نے بچوں والے گھر میں سانپ کو رکھنا ہو

ایسے مجھے ڈر لگتا ہے اس ہجراں کی نگرانی میں

kis ka aks numayan hoga aise gadle pani mein

suraj dub gaya hai mere angan ki wirani mein

is ghar ki diwar mein jane kis ke kan phanse honge

sirf yahi dar lahaq hai mujh ko har naql-e-makani mein

hijr ki shab raushan tha ghar mein ek sitara aur charagh

ankh jhapakne tak ka waqt nahin tha is hairani mein

mujh se pahle bhi kuchh wahshi is uljhan mein faut hue

akhir kis ka dast-e-junun hai wahshat ki asani mein

surkh andhera chhutne ki minnat ka phika zard charagh

chhor diya hai sanp kisi ne jhil ke sada pani mein

jaise kisi ne bachchon wale ghar mein sanp ko rakhna ho

aise mujhe dar lagta hai is hijran ki nigrani mein