سخت وحشی ہوں بلا وجہ بپھر جاتا ہوں

سخت وحشی ہوں بلا وجہ بپھر جاتا ہوں

اس لیے اپنی طرف جاؤں تو ڈر جاتا ہوں

ایک ہی طرز کی وحشت سے بھرے رہتے ہیں

میں اگر دشت نہیں جاتا تو گھر جاتا ہوں

چار چھ انچ کی دوری سے مرا سایا مجھے

اک صدا دیتا ہے میں بار دگر جاتا ہوں

بعض اوقات اداسی کو منانے کے لیے

اپنے ہونے کی دلیلوں سے مکر جاتا ہوں

لفظ بنتے ہوئے آتا ہوں سڑک پر اور پھر

جانے کیا دھیان میں آتا ہے ٹھہر جاتا ہوں

گھر سے دفتر گیا دفتر سے گھر آیا اب دشت

ویسے بنتا تو نہیں جانا مگر جاتا ہوں

sakht wahshi hun bala wajh biphar jata hun

is liye apni taraf jaun to dar jata hun

ek hi tarz ki wahshat se bhare rahte hain

main agar dasht nahin jata to ghar jata hun

char chhe inch ki duri se mira saya mujhe

ik sada deta hai main bar-e-digar jata hun

baaz auqat udasi ko manane ke liye

apne hone ki dalilon se makar jata hun

lafz bante hue ata hun sarak par aur phir

jane kya dhyan mein ata hai thahar jata hun

ghar se daftar gaya daftar se ghar aya ab dasht

waise banta to nahin jana magar jata hun